Կանադան հսկայական մասշտաբների երկիր է. այն Ատլանտյան օվկիանոսի ափերից ձգվում մինչև խաղաղօվկիանոսյան ափեզերքի բարձրաբերձ գագաթները: Սա մի յուրատեսակ երկիր է, որը բնութագրվում է իր հեքիաթային վայրի բնությամբ, բայց եւ այնպես երկիրն ունի դինամիկ համաշխարհային մակարդակի քաղաքներ, որոնք պահպանում են և՛ եվրոպական հմայքը, և՛ ժամանակակից նորարարությունը։

Իր հայտնի ջրվեժների որոտացող մռնչյունից մինչև Ժայռոտ լեռների հանդարտ վեհությունը՝ Կանադայի տեսարժան վայրերը ներկայացնում են հյուսիսամերիկյան իրական ոգին:

Նիագարայի ջրվեժ, Օնտարիո
Նիագարայի ջրվեժը թերևս ամենահայտնի բնական հրաշքն է Հյուսիսային Ամերիկայում: Տեղակայված լինելով ԱՄՆ-ի հետ սահմանին՝ Նիագարայի ջրվեժը կազմված է 3 մեծ ջրվեժներից։ Թափվող ջրի քանակով այն աշխարհի ամենամեծ ջրվեժն է, որն ուն 53 մ բարձրություն եւ 1200 մ լայնություն։ Ամեն րոպե միլիոնավոր լիտրեր ջուր է թափվում ջրվեժից՝ ստեղծելով մառախլապատ, որոտացող ահասարսուռ տեսարան, որը դարեր շարունակ գրավել է ճանապարհորդներին:

Բանֆ ազգային պարկ եւ Լուիզա լիճ
Գտնվելով Կանադական Ժայռոտ լեռների սրտում՝ Բանֆը Կանադայի ամենահին ազգային արգելոցն է: Սաղարթախիտ սոճու անտառներով ծածկված բարդ ռելիեֆը զարդարում են ձյունածածկ գագաթները՝ միաժամանակ ներառելով սարցադաշտեր, տաք աղբյուրներ եւ լճեր: Արջերի, գայլերի, իշայծյամների եւ կոյոտների ապրելավայր կանադական Ժայռոտ լեռներում գտնվող այս արգելոցը աշխարհի տպավորիչ բնապատկերներից մեկն է: Տեղանքի գոհարը Լուիզա լիճն է, որը հայտնի է ամբողջ աշխարհում իր փայլուն փիրուզագույն ջրով, որն իր եզակի գույնը ստանում է սառցադաշտային հալոցքից առաջացած «լեռնային ալյուրից»: Լինի դա ձմռանը սառած, թե ամռանը շողշողացող, այն Կանադայի բնության խորհրդանիշն է:

Կանադական Աշտարակ (CN Tower), Տորոնտո
Գերիշխելով Կանադայի ամենամեծ քաղաքի հորիզոնում՝ Կանադական Աշտարակը ժամանակին աշխարհի ամենաբարձր ազատ կանգնած կառույցն էր: Որպես ժամանակակից ինժեներական հրաշք՝ այն առաջարկում է Տորոնտոյի եւ Օնտարիո լճի համայնապատկերային տեսարաններ: Ավելին արկածախնդիրների համար «EdgeWalk»-ը թույլ է տալիս այցելուներին քայլել առանց ձեռքերի օգնության աշտարակի հիմնական հարթակի հենց եզրով՝ գետնից 356 մետր բարձրության վրա: 

Հին Քվեբեկ (Vieux-Québec)
Հին Քվեբեկ կամ Քվեբեկ քաղաքի հին թաղամասը (ֆրանսերեն՝ Vieux-Québec), կանադական ֆրանսիախոս Քվեբեկ քաղաքի պատմական կենտրոնն է: Այստեղ կարծես ժամանակը կանգ է առել 17-րդ դարի Եվրոպայում: Որպես ՅՈՒՆԵՍԿՕ-ի Համաշխարհային ժառանգության օբյեկտ՝ այն Մեքսիկայից հյուսիս գտնվող միակ ամրացված քաղաքն է: Նրա սալահատակ փողոցները, հմայիչ տները եւ վեր խոյացող Շատո Ֆրոնտենակ հյուրանոցը (ֆրանսերեն՝ Château Frontenac), որը միջնադարյան շատո ֆրանսիական ոճով կառուցված ամրոց է, ստեղծում են ռոմանտիկ, պատմական մթնոլորտ, որում արտացոլված են Կանադայի խորը ֆրանսիական ժառանգությունը: Հին թաղամասը ներառում է Քվեբեկի վերին եւ ստորին քաղաքները։ 1985 թվականին Քվեբեկի հին թաղամասը ներառվեց ՅՈւՆԵՍԿՕ-ի Համաշխարհային ժառանգության օբյեկտների ցանկում։