Խորվաթիան գտնվում է Ադրիատիկ ծովի արեւելյան ափին՝ մի տարածաշրջանում, որտեղ լեռներից ներքեւ տարածվում է կապուտաչյա ծովեզերքը, իսկ հարյուրավոր կղզիներ զարդարում են ծովը։ Այս բնական աշխարհագրությունը դարերի ընթացքում ձեւավորել է մի մշակույթ, որը միավորում է միջերկրածովյան ավազանին բնորոշ ավանդույթները եւ Կենտրոնական Եվրոպայի պատմական ժառանգությունը։

Խորվաթիան ճանապարհորդներին առաջարկում է յուրահատուկ համադրություն՝ պատմական քաղաքներ, կղզիներով լի ծովային տեսարաններ եւ ազգային արգելոցներ, որտեղ գետերն ու ջրվեժները անցնում են անտառների եւ կրաքարային ժայռերի միջով։

Դարերի ընթացքում այս տարածաշրջանը գտնվել է տարբեր մշակույթների եւ կայսրությունների ազդեցության ներքո։ Վենետիկյան ճարտարապետությունը պահպանվել է բազմաթիվ ափամերձ քաղաքներում, հռոմեական ավերակները առայսօր պահպանվել են ժամանակակից քաղաքների կենտրոններում, իսկ միջնադարյան պարիսպները շարունակում են պաշտպանել հին նավահանգիստները։

Խորվաթիան առաջարկում է տեսարժան վայրերեի զարմանալի բազմազանություն։ Մի քանի ժամյա ճամփորդության ընթացքում կարելի է անցնել արեւոտ կղզիներից դեպի լեռնային շրջաններ, ծովափնյա քաղաքներից դեպի խաղաղ գյուղեր եւ ազգային պարկեր։

Ադրիատիկի ափերը
Խորվաթիայի ափամերձ գիծը Եվրոպայի ամենագեղեցիկ ծովեզեքներից մեկն է։ Այն ձգվում է ավելի քան հազար կիլոմետր, որը ձեւավորում է ծովախորշերի, կղզիների եւ պատմական նավահանգիստների մի հարուստ աշխարհ։ Այս ափերի երկայնքով տարածվում է Դալմաթիայի տարածաշրջանը, որտեղ սպիտակափայլ պատերով եւ կարմիր տանիքների համադրությամբ տները նայում են դեպի բաց ծովը։ Դարերի ընթացքում այստեղ զարգացել են ձկնորսական գյուղեր և առեւտրային քաղաքներ, որոնք կապել են Ադրիատիկը Վենետիկի եւ Միջերկրական աշխարհի մյուս նավահանգիստների հետ։

Այսօր այս քաղաքները շարունակում են պահպանել իրենց պատմական մթնոլորտը։ Նեղ փողոցները, փոքր հրապարակները և ծովափնյա սրճարանները ստեղծում են այն միջավայրը, որը շատերի համար Խորվաթիան վերածում է անմոռանալի ճամփորդական ուղղություններից մեկը։

Ադրիատիկի կղզիները
Խորվաթիայի ափերի երկայնքով տարածված են ավելի քան հազար կղզիներ, որոնցից միայն մի մասն է մշտապես բնակեցված։ Յուրաքանչյուր կղզի ունի իր առանձնահատկությունները։ Որոշ կղզիներ հայտնի են իրենց աշխույժ ամառային կյանքով եւ զբոսաշրջային նավահանգիստներով, իսկ մյուսները պահպանել են խաղաղ կյանքը՝ հարուստ բնությամբ, խաղողի այգիներով եւ ձիթապտղի ծառերով ծածկված բլուրներով։

Բրաչ, Հվար, Կորչուլա եւ Վիս կղզիները ամենահայտնիներից են։ Այստեղ կարելի է գտնել հին նավահանգիստներ, պատմական գյուղեր եւ գեղեցիկ ծովափեր։ Կղզիների միջև ճանապարհորդելը հաճախ դառնում է Խորվաթիա այցելելու ամենահիշարժան փորձառություններից մեկը։

Պատմությամբ ձևավորված քաղաքներ
Խորվաթիայի քաղաքները արտացոլում են տարբեր պատմական դարաշրջանների ազդեցությունը։

Սպլիտ քաղաքը զարգացել է հռոմեական կայսր Դիոկղետիանոսի պալատի շուրջ, որը կառուցվել է IV դարում։ Դարերի ընթացքում այդ պալատը վերածվել է կենդանի քաղաքի, որտեղ հին պատերի ներսում գործում են տներ, խանութներ և սրճարաններ։

Ավելի հարավ գտնվում է Դուբրովնիկը, որը միջնադարում եղել է հզոր ծովային հանրապետություն։ Նրա հսկայական քարե պարիսպները այսօր էլ շրջապատում են քաղաքը եւ հիշեցնում նրա երբեմնի ուժը։

Մայրաքաղաք Զագրեբը ունի այլ մթնոլորտ։ Այստեղ կարելի է տեսնել ավստրո-հունգարական ճարտարապետություն, լայն փողոցներ եւ մշակութային աշխույժ կյանք։

Բնապատկերներ և ազգային արգելոցներ
Խորվաթիայի բնապատկերները ոչ պակաս տպավորիչ են, քան նրա քաղաքները։ Երկրի ազգային պարկերը հարուստ են անտառներով, գետերով եւ ջրվեժներով։ Ամենահայտնի բնական հրաշքներից մեկը Պլիտվիցեի լճերի ազգային պարկն է։ Այստեղ մի քանի տասնյակ լճեր միանում են ջրվեժներով՝ ձեւավորելով ջրային շղթա, որը շրջապատված է խիտ անտառներով։

Այս վայրերը ստեղծում են խաղաղ միջավայր՝ հեռու ծովափնյա քաղաքների աշխույժ կյանքից։

Մշակույթ և առօրյա կյանք
Խորվաթիայի մշակույթը ձեւավորվել է միջերկրածովյան եւ կենտրոնական Եվրոպայի ավանդույթների ազդեցության տակ։ Ափամերձ շրջաններում խոհանոցի հիմնական բաղադրիչը ձկնային եւ ծովային ուտեստներն են, մինչդեռ ներքին շրջաններում կարելի է հանդիպել ավելի ավանդական եւ բազմաշերտ եվրոպական ուտեստներ։

Ամառային փառատոնները, երաժշտական միջոցառումները եւ մշակութային տոները հաճախ անցկացվում են պատմական հրապարակներում կամ հին ամրոցների տարածքում։

Ինչու՞ այցելել Խորվաթիա.
Խորվաթիան աչքի է զարնում իր յուրատեսակ տեսարժան վայրերի համադրությամբ՝ պատմական քաղաքներ, կղզիներ եւ բնական գեղեցկություն։ Այստեղ կարելի է առավոտյան քայլել հռոմեական ավերակներով, կեսօրին լողալ Ադրիատիկ ծովում եւ երեկոյան ընթրել միջնադարյան քաղաքի նեղ փողոցներում։

Շատ ճանապարհորդների համար Խորվաթիան բացահայտում է Միջերկրականի մի անկյուն, որը պահպանել է իր բնական եւ պատմական գեղեցկությունը։

Մագելլանյան Դիտարկումներ
Մագելլայնի տեսանկյունից Խորվաթիան այն երկրներից է, որտեղ ծովը եւ պատմությունը մշտապես ներկա են առօրեական կյանքում։ Պատմական քաղաքները, կղզիներով լի հորիզոնը եւ Ադրիատիկի ջինջ ջրերը ստեղծում են մի յուրատեսակ միջավայր, որտեղ ամեն ճանապարհորդությունը վերածվում է արկածներով լի ինքնատիպ փորձառության։