Չեխիան, թեև իր չափերով փոքր է, սակայն իր կենտրոնական դիրքի շնորհիվ հանդիսանում է Եվրոպայի  կարեւորագույն օդային հանգույցներից մեկը։ Երկրի օդանավակայանները կարեւոր նշանակություն ունեն ոչ միայն երկրի ներսում այլ նաեւ հարեւան եւ հեռավոր շատ երկրների համար։ Պրահայի միջազգային հանգույցից մինչև Մորավիան կապող տարածաշրջանային ավիոհանգույցները՝ Չեխիայի օդանավակայաններն արտացոլում են թե՛ արդյունավետություն եւ թե՛ աչքի են զարնում բարձրակարգ ծառայություններով։

Պրահայի Վացլավ Հավելի անվան օդանավակայան (PRG)
Չեխիայի գլխավոր միջազգային դարպասը՝ Վացլավ Հավելի անվան օդանավակայանը, գտնվում է Պրահայի պատմական կենտրոնից ընդամենը 17 կիլոմետր հեռավորության վրա։ Սպասարկելով միջազգային հոսքերի ճնշող մեծամասնությունը՝ օդանավակայանը կապում է Չեխիան եվրոպական մայրաքաղաքների եւ հեռավոր ուղղությունների հետ։ Դրա ժամանակակից տերմինալներն առանձնանում են պարզությամբ եւ ֆունկցիոնալությամբ՝ ապահովելով սահուն անցում օդանավակայանից դեպի քաղաք։ Ժամանումից հաշվված րոպեներ անց ճանապարհորդներն արդեն հայտնվում են Պրահայի սալարկված փողոցների, գոթական աշտարակների եւ գետափնյա գեղեցիկ տեսարանների գրկում։

Բռնո-Տուրժանի օդանավակայան (BRQ)
Սպասարկելով երկրի երկրորդ ամենամեծ քաղաքը՝ Բռնո-Տուրժանի օդանավակայանը ապահովում է մուտք դեպի Մորավիայի մշակութային եւ տնտեսական կենտրոն։ Օդանավակայանը տեղակայված է Բռնոյից ոչ հեռու, իչ չափերով ավելի փոքր է, սակայն առաջարկում է ավելի հանգիստ եւ անմիջական ճամփորդական փորձ։

Սեզոնային երթուղիներն ու չարտերային չվերթները կապում են տարածաշրջանը Միջերկրական ծովի ուղղությունների հետ, իսկ քաղաքին մոտ լինելը երաշխավորում է արագ տեղափոխումը։ Հարավային Չեխիա ուղեւորվողների համար Բռնոն առաջարկում է ավելի տեղական եւ խաղաղ մուտք դեպի երկիր։

Օստրավայի Լեոշ Յանաչեկի անվան օդանավակայան (OSR)
Երկրի հյուսիս-արեւելքում գտնվող Լեոշ Յանաչեկի անվան օդանավակայանը կապում է Չեխիան Լեհաստանի եւ Սլովակիայի հետ։ Օստրավայի մոտ գտնվող այս օդանավակայանը սպասարկում է թե՛ գործարար, թե՛ հանգստի նպատակով ճամփորդողներին, հատկապես նրանց, ովքեր ցանկանում են բացահայտել տարածաշրջանի արդյունաբերական ժառանգությունն ու զարգացող մշակութային կյանքը։

OSR-ի խաղաղ մթնոլորտն ու պարզությունը այն դարձնում են երկրի ամենամատչելի օդանավակայաններից մեկը։

Կառլովի Վարիի օդանավակայան (KLV)
Ծվարած անտառապատ բլուրների մեջ՝ Կառլովի Վարիի օդանավակայանը սպասարկում է Եվրոպայի ամենահայտնի առողջարանային շրջաններից մեկը։ Գտնվելով նրբագեղ Կառլովի Վարի քաղաքի հարեւանությամբ՝ օդանավակայանը հիմնականում ընդունում է սեզոնային եւ մասնավոր չվերթներ՝ հաճախ հյուրընկալելով առողջարանային հանգստի ձգտող այցելուների։

KLV-ի մտերմիկ եւ հանգիստ միջավայրն արտացոլում է տարածաշրջանի ոգին՝ հանգիստ, նրբաճաշակ եւ անշտապ։

Պարդուբիցեի օդանավակայան (PED)
Պրահայից արեւելք գտնվող Պարդուբիցեի օդանավակայանը երկակի նշանակության (քաղաքացիական եւ ռազմական) օդանավակայան է, որը գլխավորապես սպասարկում է բյուջետային եւ չարտերային թռիչքներին։ Գտնվելով պատմական Պարդուբիցե հարեւանությամբ՝ այն հիանալի այլընտրանքային ավիոհանգույց է դեպի Կենտրոնական Չեխիա։ Թեև չափերով համեստ է, բայց եւ այնպես այն կարեւոր դեր ունի տարածաշրջանային կապերի ամրապնդման գործում։

Մագելլանյան դիտարկումներ
Չեխիայի օդանավակայանները բնորոշվում են նրանով, թե որքան սահուն եւ արդյունավետ կերպով են նրանք ճանապարհորդին կապում երկրի բազմաշերտ ինքնության հետ։ Պրահայի միջազգային օդային հանգույցից մինչև Մորավիայի խաղաղ ավիոհանգույցներն ու արեւմուտքի առողջարանային քաղաքները՝ յուրաքանչյուր օդանավակայան առաջարկում է ժամանման յուրօրինակ ռիթմ։ Միասին դրանք կազմում են մի ցանց, որն արտացոլում է հենց Չեխիան՝ կոմպակտ, հասանելի եւ հարուստ բնավորությամբ։

Ժամանել այստեղ՝ նշանակում է սկսել ճանապարհորդություն դեպի Եվրոպայի ամենահարատեւ մշակութային լանդշաֆտներից մեկը։