Հորդանանը երկար երկիր է, իսկ օդանավակայանները՝ քիչ։ Գրեթե ամեն ինչ կենտրոնացած է մի գծի վրա, որը ձգվում է բլուրների վրա տեղակայված Ամմանից՝ անապատի միջով դեպի Աքաբայի ծոց։ Այդ գծի երկու հակադիր կողմերում օդանավակայան կա։ Շատ ճանապարհորդներ վայրէջք են կատարում մեկում, իսկ մեկնում՝ մյուսից, իսկ դրանց միջև ընկած ճանապարհն անցնում է այնպիսի ​​վայրերով, որոնց համար շատ ճանապարհորդներ ուղեւորվում են այս թագավորություն՝ մասնավորապես՝ Մադաբան, Քերակ, Պետրա եւ Վադի Ռում։

Ավիացիայի տեսանկյունից՝ թագավորությունը համեստ դիրք է զբաղեցնում մյուս ավիացիոն հարուստ ենթակառուցվածքով հագեցած երկրների շարքում։ Դուբայը, Դոհան եւ Կ. Պոլիսը շատ ավելի մեծ թվով ուղեւորներ են սպասարկում, եւ շատ այցելուներ հենց այդ քաղաքներից մեկի միջոցով են հասնում Հորդանան։ Այնուհանդերձ, Ամմանը ևս գործում է որպես ինքնուրույն հանգույց։ «Royal Jordanian»-ը՝ «Oneworld» ավիացիոն դաշինքի անդամ է, որը այստեղից թռիչքներ է իրականացնում դեպի Եվրոպա, Պարսից ծոցի երկրներ, Հյուսիսային Աֆրիկա եւ Հյուսիսային Ամերիկա։ Հարեւան երկրներն այնքան մոտ են, որ Բեյրութից կամ Կահիրեից իրականացվող թռիչքների ժամանակ ինքնաթիռը հազիվ է հասցնում հասնել թռիչքային բարձրության, երբ արդեն սկսում է իջնել։

Թագուհի Ալիայի Անվան Միջազգային Օդանավակայան (AMM)
Օդանավակայանը գտնվում է Ամմանից հարավ՝ բաց տեղանքում։ Այն Հորդանան մուտք գործելու գլխավոր օդային դարպասն է եւ «Royal Jordanian»-ի ավիացիոն հենակետը։ Տերմինալը նախագծվել է «Foster + Partners» ընկերության կողմից․ դրա տանիքը բաղկացած է բետոնե ոչ խորը գմբեթներից, որոնց արանքներից ներս է թափանցում ցերեկային լույսը։ Նախագծի գաղափարը ոգեշնչված է բեդվինյան վրաններից։ Ուշ երեկոյան սրահում տիրում է յուրատեսակ եւ հանգիստ մթնոլորտ։

«Royal Jordanian»-ն ուղիղ չվերթներ է իրականացնում դեպի Նյու Յորք, Չիկագո, Վաշինգտոն, Դետրոյթ եւ Դալաս։ Եվրոպայում այն ​​սպասարկում է Լոնդոնը, Փարիզը, Ֆրանկֆուրտը, Մյունխենը եւ մի շարք այլ, ավելի փոքր քաղաքներ։ Ամման են թռչում նաև Պարսից ծոցի երկրների ավիաընկերությունները, «Թյուրքական ավիաուղիներ»-ը, ինչպես նաև եվրոպական խոշոր ավիաընկերություններ։ Օդանավակայանը գործում է «բաց երկնքի» քաղաքականության շրջանակներում, ուստի օտարերկրյա ավիաընկերություններն այստեղ կարող են ավելի ազատորեն նոր երթուղիներ ավելացնել, քան Ամմանում։ Սա հատկապես զգալի է Եվրոպայից ժամանող ճանապարհորդների համար։ Տարվա ավելի զով ամիսներին Ռայնէյր եւ Վիզզ Էյր ավիաընկերությունները Եվրոպայի տարբեր քաղաքներից ուղիղ չվերթներ են իրականացնում դեպի Կարմիր ծով՝ տեղափոխելով ջրասույզների եւ արեւային հանգստի սիրահար զբոսաշրջիկների։

Օդանավակայանը հագեցած է լաունջ սրահներով եւ անմաքս խանութներով: Նույն ժամերին մի քանի միաժամանակյա վայրէջքի ընթացքում օդանավակայանի հսկիչ-անցագրային կետերում աշխատանքները կարող է դանդաղել:

Աքաբայի Հուսեյն Թագավորի Անվան Միջազգային Օդանավակայան (AQJ)
Աքաբայի օդանավակայանը քաղաքից հյուսիս է՝ տաքսիով կարճ ճանապարհի վրա։ Թռիչքուղու մի կողմում բարձրանում են կարմիր գրանիտե լեռներ։ Տերմինալը փոքր է եւ չի էլ ձգտում ավելի մեծ երեւալ։ Ինքնաթիռից դուրս գալով՝ հայտնվում եք չոր տապի մեջ՝ չնայած օդանավակայան գտնվում է ծովի հարեւանությամբ։

Royal Jordanian ավիաընկերությունն Աքաբան կապում է Ամմանի հետ, իսկ տարածաշրջանային չվերթները հասնում են Կահիրե, Ռիադ եւ Աբու Դաբի։ Օդանավակայանը գործում է «բաց երկնքի» քաղաքականությամբ, ուստի օտարերկրյա ավիաընկերություններն այստեղ նոր երթուղի բացում են շատ ավելի հեշտ, քան Ամմանում։ Ռայնէյր եւ Վիզզ Էյր ավիաընկերությունները այստեղ ևս իրականացնում են սեզոնային չվերթներ: 

Աքաբան Վադի Ռումին ամենամոտ օդանավակայանն է։ Պետրա կարելի է հասնել ճանապարհով երկրի ցանկացած ծայրից, սակայն Աքաբայից ճանապարհն ավելի կարճ է։

Ամմանի Քաղաքացիական Օդանավակայան (ADJ)
Քաղաքի հին օդանավակայանը գտնվում է Ամմանի արեւելյան հատվածում՝ շրջապատված բնակելի տներով։ Այն սպասարկում է փոքր օդանավեր, չարտերային եւ ուսումնական թռիչքներ, ինչպես նաև դեպի Ակաբա իրականացվող որոշ ներքին չվերթներ։ Այն կարեւոր է միայն այն դեպքում, եթե տոմսի վրա նշված է ADJ կոդը։ Նախքան տաքսի պատվիրելը՝ ստուգե´ք օդանավակայանի կոդը, քանի որ սխալ օդանավակայան մեկնելը կարող է զգալի ժամանակ խլել։

Ինչպե՞ս Հասնել Օդանավակայաններ.
Հորդանանի ոչ մի օդանավակայան երկաթուղային կապ չունի։ «Թագուհի Ալիայի» օդանավակայանը գտնվում է Ամմանի կենտրոնից մոտ 35 կիլոմետր դեպի հարավ։ Քաղաք կարելի է հասնել «Airport Express» ավտոբուսով, իսկ ժամանման սրահի դիմաց սպասում են տաքսիներ։ Շատ այցելուներ այստեղ օգտվում են ավտովարձույթից եւ ուղեւորվում դեպի հարավ՝ ընտրելով կա՛մ «Թագավորական մայրուղին» (King's Highway), կա՛մ ավելի արագընթաց «Անապատային մայրուղին» (Desert Highway)։ Ակաբայում օդանավակայանը ծովափնյա հյուրանոցներից գտնվում է մոտ 10 կիլոմետր հեռավորության վրա, ուստի ճանապարհը կարճ է։ Այս հատվածում հասանելի են տաքսիներ, վարձակալած մեքենաներ եւ հյուրանոցային տրանսֆերներ։

Գործնական Նշումներ
Շատ երկրների քաղաքացիներ կարող են մուտքի վիզա ձեռք բերել անմիջապես ժամանման պահին՝ «Թագուհի Ալիայի» օդանավակայանում կամ Ակաբայում։ Որոշ երկրների քաղաքացիների համար գործում են սահմանափակումներ, եւ նրանք պետք է նախապես թույլտվություն ստանան՝ անկախ նրանից, թե որ կետով են մուտք գործում երկիր։ Շատ ճանապարհորդներ նախընտրում են ուղեւորությունից առաջ առցանց ձեռք բերել «Jordan Pass»-ը։ Այն ներառում է մուտքի արտոնագրի վճարը (այն այցելուների համար, ովքեր երկրում մնում են նվազագույն սահմանված քանակությամբ գիշերներ), ինչպես նաև ուղեւորվում են դեպի Պետրա, Վադի Ռում եւ տասնյակ այլ տեսարժան վայրեր։ Քանի որ այս փաթեթը չի համատեղվում էլեկտրոնային վիզայի հետ, նախապես որոշե´ք, թե որ տարբերակն է ձեզ ավելի հարմար։ Վիզային կանոնները, երթուղիներն ու չվացուցակները կարող են փոփոխվել, ուստի ճամփորդությունից առաջ ճշտե´ք մանրամասները ձեր ավիաընկերությունից կամ Հորդանանի պաշտոնական աղբյուրներից։

Մագելլանյան Դիտարկումներ
Եթե առաջին անգամ եք այցելում Հորդանան, խորհուրդ ենք տալիս ժամանել Ամման, իսկ մեկնել Ակաբայից (կամ հակառակը)։ Այսպիսի երթուղին թույլ է տալիս խուսափել «Անապատային մայրուղով» հետադարձ երկար ճանապարհից՝ հնարավորություն տալով վայելել ճանապարհորդությունը մեկ ուղղությամբ։

Նրանք, ովքեր նախատեսում են մի քանի օր անցկացնել Պետրայում եւ Վադի Ռումում, կարող են որպես հիմնական կայանատեղի ընտրել Աքաբան՝ հատկապես ձմռանը, երբ ուղիղ եվրոպական չվերթներ են նախատեսված։

Մարդկանց մեծ մասի համար Հորդանանը սկսվում է Ամմանի բետոնե գմբեթների տակ։ Իսկ ճանապարհորդությունը հաճախ ավարտվում է Աքաբայում, երբ պատուհանից դուրս լեռները վարդագույն են դառնում, իսկ ծովը ընդամենը մի քանի րոպե հեռավորության վրա է։