Վիեննայի միջազգային օդանավակայան (IATA: VIE), Ավստրիայի գլխավոր եւ ամենամեծ միջազգային օդանավակայանն է. այն գտնվում է Շվեչատում՝ մայրաքաղաք Վիեննայից 18 կմ հարավ-արեւելք եւ Սլովակիայի մայրաքաղաք Բրատիսլավայից 57 կմ դեպի արեւմուտք: Այն երկրի ամենամեծ օդանավակայանն է եւ ծառայում է որպես Ավստրիական Ավիաուղիների կենտրոն, ինչպես նաեւ օդանավակայանը հանգույցի դեր է խաղում Վիզ Էյր ու Ռայնէյր ավիաընկերությունների համար:

Վիեննայի միջազգային օդանավակայանը կարող է սպասարկել լայն-թափք ինքնաթիռներ՝ այդ թվում նաեւ Էյրբաս Ա380: Օդանավակայանն ունի եվրոպական ուղղությունների խիտ ցանց, ինչպես նաեւ երկարաժամկետ թռիչքներ դեպի Ասիա, Հյուսիսային Ամերիկա ու Աֆրիկա: Այն Կենտրոնական Եվրոպայում թռիչքների կարեւոր հանգույց է. մայրաքաղաք Վիեննան կապում է Եվրոպայի, ինչպես նաև Ասիայի, Միացյալ Նահանգների եւ Կանադայի հետ:

Ուղեւորների ու բեռնափոխադրումների մշտական ​​աճի պայմաններում օդանավակայանն ընդլայնվում է: Կան չորս տերմինալներ, որոնցից մեկը ներկայումս վերանորոգվում է:

Օդանավակայանի աճի ռազմավարությունը հիմնված է նաեւ դեպի Հեռավոր Արեւելք ու Մերձավոր Արեւելք թռիչքների պահանջարկի դրական դինամիկայի, ինչպես նաեւ ցածրարժեք ավիափոխադրողների միջինից բարձր աճի վրա:

Վիեննայի միջազգային օդանավակայանն ունի 2 թռիչքուղի, եւ պլաններ են մշակվում երրորդ թռիչքուղու համար.

• 11/29 - 3500 մ երկարություն, 45 մ լայնություն, IIIb կատեգորիա (ուղղություն 29)
• 16/34 - 3600 մ երկարություն, 45 մ լայնություն, IIIb կատեգորիա (ուղղություն 16)