Ֆիլիպինների Օդանավակայանները

Ֆիլիպիններ ճամփորդությունը սովորաբար սկսվում է լայնաֆյուզելաժ ինքնաթիռով, որը վայրէջք է կատարում Մանիլայում կամ Սեբուում։ Այնտեղից նեղաֆյուզելաժ ինքնաթիռը ձեզ տանում է ավելի հեռու՝ շրջանային քաղաք։ Հետո պտուտակավոր ինքնաթիռն իջնում է արմավենիների եւ ժայռերի միջև ձգվող թռիչքուղու վրա, իսկ վերջին հատվածը հաճախ անցնում է  նավակի վրա, որն այստեղ կարեւոր ջրային փոխադրման միջոց է:

Ֆիլիպինները սփռված են հազարավոր կղզիների վրա, եւ տեղի օդանավակայաններից միայն մի քանիսն են ընդունում հեռավոր չվերթեր Պարսից ծոցի երկրներից, Արեւելյան Ասիայից եւ Հյուսիսային Ամերիկայից։ Ավելի մեծ թվով օդանավակայնները սպասարկում է ներքին չվերթերը։ Եզրային կղզիներում փոքր եւ աշխույժ օդանավակայաններն են, որոնք սպասարկվում են չափերով ամենափոքր ինքնաթիռներով։

Մանիլան երկրի ամենամեծ օդային դարպասն է, թեև տարածաշրջանի տրանզիտային հանգույցը չի համարվում։ Սինգապուրը, Հոնկոնգը եւ Բանգկոկը շատ ավելի մեծ տրանզիտային հոսք են սպասարկում։ Ճամփորդների մեծ մասը Մանիլան կամ Սեբուն օգտագործում է որպես երկրի գլխավոր մուտք եւ անմիջապես շարունակում են ճանապարհորդությունը։

Գլխավոր Օդային Դարպասները
Մանիլայի Նինոյ Ակինոյի անվան միջազգային օդանավակայանը (MNL) գտնվում է հենց քաղաքում, եւ վայրէջքները անցնում են տանիքներին ու խցանումներին չափազանց մոտ։ Չորս տերմինալները ցրված են թռիչքուղիների շուրջը եւ անվտանգության գոտու հատվածում իրար միացված չեն։ Տերմինալ փոխելու համար պետք է դուրս գալ անվտանգության գոտուց, անցնել օդանավակայանի ճանապարհներով ու քաղաքային երթեւեկության միջով եւ նորից անցնել ստուգում։ Շենքերը կապում է անվճար ավտոբուսը, բայց տերմինալների միջև փոխադրման համար անհրաժեշտ է ժամանակի մեծ պաշար։ Այժմ օդանավակայանը կառավարում է մասնավոր օպերատոր, որը փուլ առ փուլ թարմացնում է այն՝ նոր սպասասրահներով, սննդի գոտիներով եւ անձնագրային ստուգման ավտոմատ դարպասներով։ Ավիաընկերությունները մեկից ավելի անգամ են փոխել տերմինալները, ուստի ստուգեք ձեր ամրագրման մեջ նշված տերմինալը։ Երկաթուղային կապ դեռ չկա, եւ քաղաք են հասնում Grab ծառայությամբ, տաքսիով կամ օդանավակայանի ավտոբուսներով։

Ֆիլիպինյան Ավիաուղիները Մանիլայից թռչում է Լոս Անջելես, Սան Ֆրանցիսկո եւ Տոկիո։ Էմիեյթս, Քաթար Էյրվեհզ եւ Էթիհադ ավիաընկերությունները Մանիլան Եվրոպային կապում են Դուբայի, Դոհայի եւ Աբու Դաբիի միջոցով։ Cebu Pacific ավիաընկերությունն այստեղից խիտ բյուջետային ցանց ունի ամբողջ Ասիայում։

Նրանց համար, ովքեր ուզում են շրջանցել Մանիլան, Մակտան Սեբու միջազգային օդանավակայանը (CEB) հաճախ ավելի հարմար է որպես մուտքի դարպաս։ Նրա միջազգային տերմինալը ծածկված է սոսնձված փայտից կոր կամարներով եւ ավելի շատ հանգստավայր է հիշեցնում, քան տրանզիտային շենք։ Սեբուն գտնվում է Վիսայան կղզիների կենտրոնում, ուստի հարմար է Բոհոլ, Սիարգաո եւ հարավային կղզիներ մեկնելու համար։

Մանիլայից հյուսիս, Պամպանգա նահանգում, նախկին ավիոհանգույցը դարձել է Քլարկ միջազգային օդանավակայան (CRK)։ Պարզ օրերին թռիչքուղուց այն կողմ հարթավայրից վեր է խոյանում Արայաթ լեռը։ Նրա նոր տերմինալը սպասարկում է Ասիայի ներսում չվերթերի աճող ցանկ։ Քլարկն իր վրա է վերցրել նաև պտուտակավոր ինքնաթիռներով չվերթները, որոնք նախկինում մեկնում էին Մանիլայից, եւ այժմ այստեղից են մեկնարկում կղզիներով կատարվող բազմաթիվ ճամփորդություններ, այդ թվում՝ դեպի Կորոն, Էլ Նիդո եւ Սիարգաո։

Հեռավոր հարավում Մինդանաոն ունի իր սեպական օդային դարպասը՝ Դավաոյի միջազգային օդանավակայանը (DVO). այստեղ հորիզոնում երևում է երկրի ամենաբարձր գագաթը՝ Ապո լեռը։

Կղզիների Օդանավակայանները
Կատիկլանի օդանավակայանի (MPH) շնորհիվ Բորակայն չափազանց մոտ է թվում. այն պաշտոնապես կոչվում է Գոդոֆրեդո Պ. Ռամոսի անվան օդանավակայան։ Երկարացված թռիչքուղին ընդունում է A320 տիպի ռեակտիվ ինքնաթիռներ Մանիլայից եւ Սեբուից, իսկ նավամատույցը տերմինալից մի քանի քայլի վրա է։ Այժմ օդանավակայանն ընդունում է նաև երեկոյան չվերթներ, բայց քանի որ գտնվում է անմիջապես ծովի ափին, վատ եղանակը կարող է չվերթի չեղարկման պատճառ դառնալ։ Նույն Պանայ կղզում Կալիբոն (KLO) սպասարկում է դեպի Բորակայ միջազգային հոսքի մեծ մասը, այդ թվում՝ սպասարկելով կանոնավոր եւ չարտերային չվերթեր Արեւելյան Ասիայից։ Կալիբոյից մինչև նավամատույց ճանապարհը երկար է, ուստի ներքին ճամփորդների մեծ մասն ընտրում է Կատիկլանը։

Եթե մեկնում եք Պալավան, ժամանումների մեծ մասը բաժին է ընկնում երեք օդանավակայանների։ Պուերտո Պրինսեսան (PPS) ընդունում է ռեակտիվ ինքնաթիռներ եւ հարմար է ստորգետնյա գետի ու դեպի հյուսիս ձգվող երկար ճանապարհի համար։ Էլ Նիդոն (ENI) փոքր մասնավոր օդանավակայան է, որի տերմինալն ավելի շատ լողափնյա տաղավար է հիշեցնում։ Այստեղ վայրէջք են կատարում միայն փոքր պտուտակավոր շարժիչներով ինքնաթիռներ, եւ տեղերը շուտ են սպառվում։ Բուսուանգան (USU) սպասարկում է Կորոնը։ 

Բոհոլ Պանգլաո օդանավակայանը (TAG) ավելի նոր է եւ գտնվում է Պանգլաոյի լողափերի մոտ։ Օդանավակայանը մեծամասամբ սպասարկում է ներքին չվերթեր եւ որոշ չվերթեր էլ ընդունում է Արեւելյան Ասիայից։ Սիարգաոն (IAO) փոքր օդանավակայան է Սայակում, որը երկրի ամենահայտնի սերֆինգային կղզին է։ Այստեղ չվերթները ժամանում են Սեբուից եւ Քլարկից։

Նախքան Չվերթը
Ներքին չվերթները տոների շրջանում արագ են ամրագրվում։ Ամենափոքր ինքնաթիռներն ունեն ուղեբեռի խիստ սահմանափակումներ, հաճախ ավելի խիստ, քան թույլ է տալիս ձեր միջազգային տոմսը։ Թայֆունները կարող են տեղաշարժել կղզիների չվացուցակը, ուստի միջազգային մեկնումից առաջ մեկ հավելյալ օր նախատեսեք։

Երկիր մուտք գործող կամ այն լքող յուրաքանչյուր ճամփորդ գրանցվում է eTravel պետական հարթակում (etravel.gov.ph) ժամանումից կամ մեկնումից առաջ 72 ժամվա ընթացքում։ Գրանցումն անվճար է, իսկ դրա համար գումար պահանջող կայքերը պաշտոնական չեն։ Շատ երկրների քաղաքացիներ սահմանափակ ժամկետով մուտք են գործում առանց վիզայի։ Տերմինալները, չվացուցակները եւ մուտքի կանոններն այստեղ փոխվում են ավելի հաճախ, քան երկրների մեծ մասում, ուստի մեկնելուց առաջ մանրամասները ճշտեք ավիաընկերությունից եւ պաշտոնական աղբյուրներից։

Մագելլանյան Դիտարկումներ
Եթե Եվրոպայից կամ Պարսից ծոցի երկրներից թռչում եք Բորակայ կամ Բոհոլ, Սեբուն հաճախ ավելի նպատակահարմար է, քան Մանիլան։ Էլ Նիդոյի, Կորոնի եւ Սիարգաոյի դեպքում նախ ստուգեք, թե արդյոք ձեր կղզային չվերթը մեկնում է Քլարկից, եւ միայն հետո ամրագրեք ժամանումը Մանիլա, քանի որ այդ երկու օդանավակայանների միջև ստիպված կլինեք ցամաքով գնալ։ Մանիլան հարմար է Լուսոնի եւ հյուսիսի համար, Դավաոն՝ Մինդանաոյի։

Տերմինալները գործածելի են, իսկ նորերը՝ նույնիսկ շատ ավելի լավ։ Այնուամենայնիվ, սպասարկումը տարբերվում է՝ կախված տերմինալից եւ ժամից։ Ճամփորդների հիշողության մեջ սովորաբար մնում է վերջին հատվածը՝ փոքր ինքնաթիռ, կարճ թռիչքուղի, ափին սպասող նավակ։ Ֆիլիպիններում ինքնաթիռները փոքրանում են, իսկ ճամփորդությունը՝ գեղեցկանում։